Bald isch es sowyt

Nur no e kurze Ändspurt bis zum lang erwartete Augebligg. Hüt zobe no e Marschiebig in dr Kälti mit aschliessender Schlussorientierig... mit de letschte Infos für d'Fasnacht. Am Weekend die letschte Vorbereitige...   no die letschte Sache am Koschtym fertig mache.

Am Sonntig Nommidag derfe mr denn ändlig d'Latärne gseh... Sie begleitet uns die ganzi Fasnacht... zäme bringe mr denn unseri Lampe in d'Stadt und sin in Gedange scho bim Morgestraich...

Aber... nümm lang und mr stöhn zwüsche Fischmärt und Märtplatz parat und erwarte die letschte Sekunde vor em 4i Schlag. Es schreit us allene Gasse rund um uns umme... "Morgestraich vorwärts MARSCH!!!". S'Liecht goht ab und es lauft eim kalt und warm dr Rugge durab. Die heiss ersehnti Fasnacht isch ändlig do.

In däm Sinn... gniesset die letschte Täg vorfreud... Wie heissts so schön... "Vorfreud isch die schönsti Freud"!