Chronik 1920 - 1960

 

D`CHRONIK VO DR J. B. GLYGGE   1920   --   1960     Text von Walter Rast


Im Johr nynzähhundertsächzäh im erschte Wältkrieg het's fascht
jede Sunntig in Basel 6er Fuessball-Tournierli gä. Dozmool
hänn in dr Santihans jungi Fuessballer dr F. C. Joung-Bois
grindet und hänn an dene Tournierli mitgmacht. Nit nur s'gueti
Fuessballspiile het die junge Lyt uszeichnet, nai au gueti
Kamerade sin's g'si untere-n-ander und die wo vo dozmool
no am Läbe sin, sin's hyte no. Wo d'rno d' J. B. in S.F. A.V. uffgno worde sin,
hänn si wohl oder ibel miesse dr Name opfere,
denn in Bärn hets jo scho e Fuessballclub Y. B. gää.

                                        *        *        *        *        *

Nur schwer hänn sich die junge Lyt kenne vo däm Name trenne,
d'rum bald no-n-em erschte Wältkrieg, ano Nynzähhundert-
zwanzig hän e paar vo däne junge Fuessbälleler in dr Santihans
zem erschte mool e Wage unter-em Name „J.B.Clique" lo laufe.
Und das isch eso koo. Die zwei Grinder, dr Ruedi Veltin
Als erschte und langjährige Säckelmaischter und dr laider
Vor e paar Johr verschtorbeni Schorsch Strohmaier als erschte
und bis zue sy-m Läbens-änd langjährige Obma, hänn abgmacht,
richtig Fasnacht und zwor aifach e Giggernillis Wage z'mache.
S'het jede kenne alege was-er g'rad fir e Coschdym g'ha het.
Aine het no sy Handorgele mitgno und het als wider aine
g'fäderlätzt und die Andere hän s'scheenschti Gaudi g'ha derby!

          *        *        *         *        *

Wo me denn am Stainebärg näbe-n-em Fasnachts-Comité dure-n-isch,
het aine vo dä-ne Herre g'froggt, wär do dr Schef syg ? Afin,
e paar Wuche speeter het d' „J.B.Clique" denn vom
Comité e glai Subventiönli g'riegt. Die paar Batze sin aber
nit in Alkohol umg'setzt worde, nai, me het si scheen uffgspart
fir's ander Johr und het dr Wage besser und mit-eme richtige
Sujet uusbaut. E so isch me mit de Johre aini vo de beliebteschte
Wage-Clique worde.

          *        *        *       *        *

An dr Fasnacht nynzähhundertsäxedrissig aber isch d' "J.B.
Clique" erscht so rächt bikannt worde mit-em Sujet
„Naii Basler – Zytig" alias „E Vaterländisch 20 Pfennigblatt".
Während die ganzi Stadt dr Gnuss an däm Sujet g'ha het,
so het's aber ainzelne Herre absolut nit basst (ebe dä-ne
Zwanzigpfennigblatthelde) und si hänns duredruggt, dass dr
Wage am Mittwuch konfisziert worde-n-isch. Worum? Zwai Värs vo
dämm Zeedel (dichtet vom laider au scho lang verstorbene
Migger Schiesser) verrote alles: Do sin-sy!

Wenn dur „d'Aesche duesch schpaziere,"
Blyb e gli bim „Hirze" schtoh,
Kasch e Zytig dert schtudiere,
Wo s'"Vaterland" in Pacht het g'noh,
Das allei nur Aidgenessisch schrybt,
(Vo drausse haig me d'Manuskript)
Die „neiji Basler" do bisch platt,
Me sait jetz:- Zwanzig-Pfennigblatt".
         *           *           *           *

„Bodeschtändig" mechtsch du schrybe,
„Urschwyzerisch" „die Ainzig" sy,
Mechtsch em „Basler Volgg" dr Bummi rybe,
Noh-re bikannte „Melodie",
Wo's haisst, mer haige „Drägg im Grind",
Au sei me dimmer, „wie ne Kind",
So „bleedi Schprich", die hänn mer satt,
Verschtohsch: Du „Zwanzig Pfennigblatt".
         *          *            *           *

Im Verlauf vo de Johre isch me mängmool g'schtupft worde,
d'Wage Clique doch zue-n-ere Gsellschaft uusz'baue. Me het
lang nit welle, denn „Kleini Kinder, kleini Sorge"
„Grossi Kinder, grossi Sorge" und het schliesslig dr Endschei-
dendi Schritt doch g'macht.

      *         *         *         *        *

D' „J.B.Clique" Santihans als aigentlichi Gsellschaft
Bistoht sit-em 18.Märze nynzähhundertachtedrissig. Im
Restaurant „Schlachthof" in dr Elsässerstross bim Karli
Breitenstein, dä au dr erschti Trummelchef g'si isch, isch
d'J.B.Clique mit-er-e Handvoll Trummler und Pfyffer als
richtigi „Fasnachts-Clique" uus dr Taufi g'hobe worde. Und
was hyt no wichtig isch, me het versproche, nie kai Unterschid
z'mache z'wische „Manne und Fraue" „Buebe und Maitli", wäms
bi dr Clique g'falli, haig aifach zuetritt. Me het d'Clique
do und dert als Aitagsfliege abtue welle, will d'Yberliferig
sait, in dr Santihans haig no kai Gsellschaft länger als 3 Johr
äxistiert. Hyte aber schtoht fescht, dass do d'Gschicht wider e
mool nit rächt g'ha het. Allerdings isch z'sage, jedefalls will
d'J.B.Clique aigentlich scho während e-me-ne Krieg
s'Liecht dr Wält erblickt het, miess au no dr Grindig als
„grossi Clique" wider e Krieg dryfungge. So hets ano nynzäh-
hundertnynedrissig grad no zue-me-ne klaine Zigli g'längt.
Am Morgestraich e paar Stäggelatärne, fünf Pfyffer und
vier Trummler und am Nomittag mit-eme Wage. D'rnode isch dr
Kampf ums äxischtiere koo. Mängmool während em Krieg het
Clique grad no am-e-ne runde Tisch platz g'ha. Fir ans Monschter
im Kiechli, denn me isch jo vom Comité als grossi „Clique"
akzeptiert worde, het me sich mängmool uus 2 oder 4 verschydene
„Clique" Lyt uusglehnt. Aber d' „J.B.Clique" isch nit untergange,
im Gegeteil, d'Vereinsleitig hets'neetigi Vorkehrt. Het unter dr
Laitig vom Hans Panosetti (hyt no e Danggerscheen) e Trummelschuel
uffzoge und wo dr zweiti Wältkrieg umme g'si isch, het ano
Nynzähhundertsäxevierzig am erschte Nohkriegsmonster erschtens
d'J.B.Clique kenne d Trummelschuel im Kiechli ibernäh (und was
fir aini, die ganzi Bihni volle Buebe) und zweitens isch an dr
Fasnacht d'Gsellschaft s'erschti mool mit-er-e grosse Latärne,
Vorryter und-e-me Harscht vo Pfyfer und Trummler uffgruggt.
D'J.B.Clique het sich d'rmit dr Platz an dr Sunne erkämpft
g'ha. Vo dert ewägg hets kai Zrugg me gää, immer isch es
Vorwärts gange.

 *       *       *       *       *

Laider isch au d'J.B.Clique nit vo innere Kryse verschont blibe.
Vieli hänn im Verlauf vo de Johre d'Gsellschaft verlosse, uus
däne oder jene Grind. Alli aber hänn e-moll am glyche Sail
z'ooge. Alle syg an däre Stell dr Dank uusg'sproche fir das,
was sy fir d'J.B.Clique g'laischtet hänn. Dr allergreschti
Dank g'heert aber dä-n-e, wo uns hänn miesse fir immer verloo
Und dert sin, wo scho so vieli Liebi und Gueti Fasnächtler sin.

   *       *       *       *        *

Mir alli hoffe, e paar scheeni und g'mietligi Stunde am
vierzigschte Geburtstag vo dr J.B.Clique z'ämme z'verläbe
und hoffe drzue vo Härze, au dr fuffzigschti Geburtstag
dr G'sellschaft mit-e-n-ander fyre z'kenne!